Проширување на Домот за стари лица и поддршка за пензионерите, најави кандидатот за советник Миле Андоновски

Проектот се состои од две фази: дислокација на ЈП „Чистота и зеленило“ во просториите на поранешната касарна и изградба на нови капацитети за Дом за стари лица „Зафир Сајто“.

„Во првата фаза се предвидува адаптација и модернизација на поранешните касарни објекти за сместување на јавното претпријатие. Ова ќе овозможи оптимизација на работниот простор, подобрување на логистички процеси и ослободување на сегашните локации за други јавни намени. Во втората фаза се планира изградба на современ Дом за стари лица со капацитети што ќе овозможат квалитетна грижа и сместување на постарите граѓани. Новиот дом ќе биде опремен со сите потребни здравствени и социјални услуги, вклучувајќи дневен престој, медицинска нега и рекреативни активности. Проектот има цел рационално користење на просторот, подобрување на јавните услуги и создавање подобри услови за работниците и корисниците“, кажа Андоновски.

Проектот треба да се реализира од 36 до 48 месеци, а буџет од 90 до 120 милиони денари.

Една од мерки во програмата на коалицијата е и пензионерската картичка- поддршка за достоинствен живот на пензионерите, која ќе се овозможи преку партнерство меѓу локалната самоуправа и здруженијата на граѓаните од третото доба, со договори со локалните продавници, стоматолози, аптеки, транспортни компании, осигурителни друштва, кино, театар - пензионерите ќе имаат можност за постојани попусти и погодности преку пензионерската картичка.

„Како позначајна мерка за издвојување е и финаниска поддршка за пензионери приматели на минимална пензија. Целта е да се подобри квалитетот на животот на најранливата категорија на пензионери преку додлеување на еднократен паричен надомест во износ од 1500 денари“, кажа Андоновски.