Работилница за деца како дел од Фестивалот на прозата во Куманово

Настанот е дел од Меѓународниот фестивал на прозата, а учествуваа ученици од 2 и 5 одделение од „Крсте Мисирков“.

„Си поминуваме убаво, уживаме, а на крај децата разбраа дека е многу важно да се пишува, да се учи и да се чита за да се биде отворен кон светот. Ова сега за мене е остварување на еден малечок сон, да можам да бидам раскажувачка, седната на стол што се клацка и децата да можат да чујат нешто повеќе од тоа што имам напишано“, истакна авторката Голејшка- Џикова.

Децата лесно се анимираа, привлечени од интересната приказна и активно се вклучија со свои мисли и заклучоци на темата. Додаваа и одземаа, покажуваа што научиле, но и придонесуваа со свои идеи на развиток на темите во друга насока. Работилницата најмногу личеше на неформален настан, исполнет со џагор и довикување, насмевки и заинтересирани ширум, отворени очи.

На почетокот на работилницата беше отворена изложба на илустрации на Иванка Ниба, од повеќе различни книги за деца. Полека беа воведени во темата, покажаа особен интерес и желба за учество на она на што присуствуваа.

„Децата во Куманово се прекрасни, имаат многу голема желба, жедни се за знаења од било која сфера- илустраторска, писателска. Самите се вклучуваат во приказната, за мене е изненадувачки што се многу дициплинирани, преубаво си поминувам. Имаат милион прашања и одговори, она што го бараме од нив да се сработи на работилницата го добиваме со максимален квалитет од нивна страна, во однос на емоција, на чувства. Многу ми е драго што се вклучени во еден ваков фестивал, што е начин да им градиме вредности“, констатираше илустраторката Иванка Ниба.

Ова е трето издание на Фестивал на прозата во Куманово, настан кој полека се етаблира на книжевната мапа во државата и станува традиционален. Во рамките на фестивалот секоја година се одржуваат работилници за деца, со што и најмалите се вклучуваат во програмата.  

Фестивалот на проза во Куманово е поддржан од Министерството за клутура и туризам со 300.000 денари и Општина Куманово со 10.000 денари.