Се чистат дивите депонии во „Бавчи“, ќе се постават нови контејнери

За два дена биле изнесени 10  камиони со над 240 кубика смет,  кои несовесните граѓаните го фрлаат покрај улицата и на останатите места. 

„Откако ќе се исчисти на три локации ќе бидат поставени 15 контејнери. Ги повикуваме граѓаните да не ги оштетуваат, да не ги палат и да не им ги крадат тркалцата, како што тоа го правеа во изминатиот период. Апелираме да ги сменат навиките, сметот да го фрлаат во новите садови а не надвор од нив. Да се подигне на повисико ниво хигиената, бидејќи од високите температури демне опасност по здравјето и безбедноста на граѓаните во населбата“, велат од ЈП „Чистота и зеленило“, кои по кој знае која пат ги чистат депониите.

Дивите депонии во населбите „Перо Чичо“, „ Бавчи“, „Средорек“ и по течението на реката Кумановка, се децениски еколошки проблем на градот, кој локалните власти не успеваат да го решат. Граѓаните се разочарани и бараат координирана акција на сите надлежни служби со строги казни за прекшителите на законот, за да се спречи самоволието на поединци кои го загрозуваат здравјето на сите граѓани и ја уништуваат животната средина. Дивите депонии се палат во текот на целата година и го трујат целиот град, како што беше случај и во изминатите денови.

Во создавањето на депониите помагаат и превозниците со импровизирани мотокултиватори и други возила, кои отпадот од домаќинствата го исфрлаат на овие локација наместо да го носат на депонијата „Краста“.