Зачленете се во нашиот клуб на читатели и најновите текстови ќе ги добивате на вашата мејл адреса
Соба за сензорна интеграција и современ третман на деца со пречки во развој доби Основното училиште „Браќа Миладиновци“ во Куманово.
Сензорната соба е составена од две простории, во кои се наоѓа модерна опрема според европските протоколи и стандарди, каде ќе се врши комплетна физичка, аудитивна и визуелна стимулација за развој на овие деца.
„Целата постапка ја инициравме јас и мојата колешка Наташа Ѓорѓевиќ, кои сме дефектолози во училиштето. Сакавме да им помогнеме на нашите ученици во нивниот понатамошен развој, па таа идеја на крај ја имплементиравме на овој начин. Сензорната соба подразбира сензорни ефекти, сензорна стимулација за деца со пречки во развојот, за деца со аутизам, церебрална парализа, даунов синдром и останати невролошки нарушувања. Со секое дете ќе се работи индивидуално а за третманот на работа ние ќе посетиме и дополнителна обука“, вели дефектологот Тино Шаботиќ.
Првата просторија е звучно и визуелно изолирана за потребите на учениците, а составена е од сензорна туба, сензорни влакна и сензорни ефекти. Во втората просторија ќе бидат поставени реквизити кои ќе помогнат за физичка активност и физичка стимулација на децата.
„Очекуваните ефекти од оваа соба се интеграција, стимулација и смирување на децата. Доколку детето е хиперактивно, аутистично, ефектот на оваа соба ќе биде детето да се смири, да биде стимулирано со оваа соба, така што потоа ќе може лесно да ги помине часовите коишто се предвидени тој ден на училиште“, додава дефектологот Наташа Ѓорѓевиќ.
Средствата за реновирање на просторијата и набавка на реквизитите се обезбедени од приватни донатори, се одржа хуманитарен концерт, аукција на слики, а свој придонес дадоа и приватни лица и уметници. Во училиштето настава посетуваат околу пеесетина деца со пречки во развојот.
(Ф.Марковска)