„Снежана на крајот умира“ од утре игра во МКЦ „Козјак“ Куманово

Оваа македонско-кипарска копродукција имаше онлајн светска премиера во јануари на Сламденс во Парк Сити (САД), а потоа беше прикажан на затворањето на неодамнешниот фестивал „Браќа Манаки“ во Битола.

„Снежана на крајот умира“ е опишан како социјална драма во амбалажа на комедија на апсурд, која се занимава со тоа колку е ужасно тешко да се остане чесен и верен на своите принципи во морално корумпирана средина. Филмот е составен од 3 испреплетени приказни за 3 групи луѓе, животите на една хикикомори уметница, радиоводител со Аспергеров синдром, сопственик на видеотека, филозоф од пред гранапче, креативен директор и гинеколог-антинаталист.

Во актерската екипа се Верица Недеска, Наташа Петровиќ, Сашко Коцев, Дениз Абдула, Ивица Димитријевиќ, Давид Јанакиев и Тино Костадиновски. Сценарист и режисер е Кристијан Ристески, продуцент е Дарко Попов, кинематографери се Димо Попов и Севдије Кастрати, монтажер е Горан Вуќиќ, автори на музиката се Александар Пејовски и Ставрос Макрис, сценограф е Сашо Блажевски, а костимите ги изработи Емилија Ивановска-Атанасовска.

Филмот ќе се прикажува до крајот на неделата. Почетокот на филмот е во 20 часот, а цената на билетот е 120 денари.