Сочувство до семејството на загинатите деца во Романовце изразија првите луѓе на државата и општината

Премиерот Оливер Спасовски вечерва на својот фејсбук профил изрази сочувство до семејството кое загуби три деца во експлозија на плинска боца во селото Романовце.

– Длабоко сочувствувам со моите сограѓани од Општина Куманово, жители на село Романовце, за трагично загубените животи на три дечиња и посакувам брзо закрепнување на останатите седум повредени, напиша Спасовски.

- Сочувство за семејството и блиските за несреќата во кумановското село Романовце во која животот го изгубија три деца, а уште шест лица се повредени. Загубата е ненадоместлива, се надевам повредените, на кои во моментов им се пружа медицинска помош, ќе бидат добро, напиша претседателот Стево Пендаровски.

 - Сочувство до семејствата на загинатите во несреќата што денеска се случи во селото Романовце. На повредените им посакувам побрзо закрепнување. Во контакт сум со претседателот на месната заедница во оваа село и како општина стоиме на располагање за помош во рамките на нашите можности и надлежности, напиша градоначалникот Максим Димитриевски.

- Најдлабоко сочувство до семејствата на загинатите во несреќата во Романовце за огромната загуба. Искрени желби за брзо и успешно закрепнување на повредените, - напиша претседателката на Советот Атина Мургашанска.

Сочувство изразија и лидерот на СДСМ Зоран Заев и голем број на личности од јавниот живот и граѓани. Сите жалат за големата несреќа, во која животот го загубија 3 деца, а уште седум членови на семејството се повредени, од кои четворица се во тешка здравствена состојба.