Третина од угостителските објекти во градот немаат дозвола за летни тераси

Советникот Благојче Јакимовиќ на последната седница на Советот ги праша надлежните служби дали се исплатат направените измени и усогласување на одлуката за поставување на урбана опрема што минатата година ги направи Општина Куманово.

„Колку од угостителските објекти имаат поднесено и добиено одобрение за урбана опрема и колку средства по тој основ се соберени до сега“, - изјави Јакимовиќ.

Раководителката на Секторот за комунална инфраструктура и животна средина,  Лидија Ланг Спасовска, одговори дека до нив пристигнале околу 70 барања за поставување на урбана опрема.

„Од страна на секторот одобрени се 45 и по истиот основ се приберени 6 милиони денари. За сите угостителски објекти кои немаат добеиено одобрение се водат постапки во Секторот за инспекциски надзор“, - информираше Ланг Спасовска.

Јакимовиќ побара сите угостителски објекти кои немаат дозвола урбаната опрема да биде отстранета од зелените површини.

Одлука за унифицирање на времените објекти и урбаната опрема на територијата на Општина Куманово беше донесена во јули минатата година со цел да се среди хаосот со дивите објекти, па наместо најлони и пластики се наложи да се постават настрешници од стакло кои ќе бидат монтажни, со цел да се натераат закупците да плаќаат за узурпираниот простор и со тоа да се полни општинската каса. Дотогаш од 74 угостителски објекти само 6 плаќале надомест за користење на јавна површина за што во општинската каса се слевале симболични средства од 1 милион денари.