Учениците од здравствената струка го одбележа Денот на сестринството

Настанот се одржа на платото пред училиштето со присуство на бројни гости, здравствени работници, но и ученици во девето одделение кои би сакале да го продолжат школувањето на здравствената насока.

Присутните првин ги поздрави директорот Драган Јаневски.

„Посакувам добредојде на сите присутни, особено на колегите и нивните ученици од основните училишта во градот кои покажаа интерес за денешниот настан, но и условите во нашето училиште. За таа намена организиравме тематски, мини отворен ден за здравствената струка, за да деветоодделенци кои го посетија нашето училиште, ги видат нашите кабинети и простории каде што се едуцираат идните медицински сестри“, истакна во поздравниот говор Јаневски.

На манифестацијата беше изведен игроказ за актуелни, секојдневни проблеми со кои еден здравствен работник се соочува и во професионалниот и во приватниот живот, како и предрасудите на кои е изложен. Учениците на „Наце Буѓони“ изведоа и танцова и музичка точка, но беше демонстирано и пружање на прва помош од волонтери на Црвен крст.

Во Техничкото училиште од 2003 година се воведени паралелки на здравствена струка- медицинска сестра.  Секоја година завршуваат околу 170 ученици и ова е едно од најбараните занимања.

 Меѓународната недела на сестринството се одбележува од 5 до 12 мај. Целта е да се истакне значењето на оваа хумана професија.