Зачленете се во нашиот клуб на читатели и најновите текстови ќе ги добивате на вашата мејл адреса
За неполни два месеци, речиси целосно е уништена урбаната опрема во детското катче во населбата Бавчи, спроти поранешен Туш.
Поголем дел од лулашките не се во функција, односно искршени се или целосно откорнати. И останатите играчки имаат делумни оштетувања, пред се делови од клацкалките и подлогата.
„Игралиштето не наликува како кога беше пуштено во употреба. Децата неправилно ја користат урбаната опрема, се качуваат таму каде што не треба и насилно се однесуваат. Доаѓаат и поголеми коишто не смеат да ги користат играчките. Прво треба голема едукација и елементарна култура и на децата и родителите, дури и за ваков простор за рекреација и уживање“, велат жителите од населбата „Перо Чичо“, кои веднаш по отварањето на игралиштето не веруваа дека тоа ќе опстане долго време.
Овој детски парк – игралиште, како дел од проектот „Чиста околина – здрава животна средина“, го реализираше невладината организација ДРОМ со Општина Куманово. Паркчето е со вкупна површина од 100 м2, беа поставени лулашки, лизгалки со куќички и клацкалки и за негова изградба беа одвоени средства во висина од 307.660 денари. Идејата беше да се создаде модерен и забавен дел за најмладите, на место кое порано беше главна депонија во градот.
(Д.Давитковски)