Зачестија пожарите на отворено во кумановско

Последната недела на повеќе локации во кумановско регистирани се дури 17 пожари на отворено.

Според информацијата од Територијалната противпожарна единица, само во текот на вчерашниот ден нивни екипи интервенирале на 5 пожари и тоа во селата Доброшане, Биљановце и Скачковце, како и покрај автопатот Куманово-Скопје, во селото Дељадрвце. Најголем бил пожарот од т.н. Искрин мост до Добрешане, кој го гаснеле од 17.40 до 23.10 часот.

Командирот на Деан Илиевски, вели дека имаат зголемен обем на работа иако не е вообичаено во овој период од годината да има толку пожари на отворено. Тој се сомнева дека станува збор за подметнати пожари за да изгори сувата трева и да изникне нова за испаша на добитокот.

„Апелирам до граѓаните да се воздржат од палење на тревата, бидејќи со тоа предизвикува голема штета. Се уште не е почната сезоната на топло време, а ние имаме полни раце работа, дури 17 пожари за 7 дена“, вели Илиевски  

Пожарникарите вчера интервенирале и при гаснење на запалено ѓубре на булеварот „Октомвриска Револуција“, како и на запалено патничко моторно возило на автопатот во атарот на Агино Село.

(С.Н.)