Започна „Графити фест“ - се цртаат мурали на Гимназијата „Гоце Делчев“

Оваа година се цртаат мурали на Гимназијата „Гоце Делчев“, поточно ѕидовите на т.н. нов дел, кон улицата „Прва петолетка“. Организатор е Здружението за ликовна уметност „Форма“ од Куманово. Првите три дена- среда, четврток и петок ќе се работи на изработка на муралите, а главниот настан е закажан за сабота, 10 мај.

„Ги повикуваме сограѓаните, публиката во сабота да погледнат што сме сработиле и на едно заедничко дружење. Планиран е урбан настан со 4,5 диџеи, но и спортска програма за најмалите, за што е задолжен професорот Југослав Спасиќ. Секоја година растеме како фестивал, а ова е единствен таков настан во државата“, објасни Горан Стојанов од здружението „Форма“.  

Уметниците цртаат по сопствена замисла, имаат целосна слобода во изразувањето, а и самиот концепт на графити- уметноста е без ограничувања.

Ќе настапат уметници од Италија, Грција, Германија, Полска, Шпанија и од земји од регионот. Фестивалот веќе од втората година на одржување има меѓународен карактер, а и огормна популарност меѓу кумановци.  

Со својата измината работа „Форма“ го популаризираше овој тип на уметност, па имаат работа постојано. Ги повикуваат градоначалници од други градови, сопственици на големи фирми и објекти, а веќе добиваат и понуди од странство.

Од минатата година започнаа и со графити караван во други градови, повторно со цел да се популаризира уметноста и во останатите места од државата- лани беа во Кочани, а сеуште одлучуваат во кој град да гостуваат во 2025 година. Караванот се одржува на почетокот на есента.