Две победи и еден пораз за кумановските екипи викендов

Кошаркарите на МКК Куманово на домашен терен го совладаа Работнички со 90:73 и со сигурна партија дојдоа до нов триумф во завршницата на сезоната. Домашниот состав постепено ја градеше предноста и не му дозволи на противникот да се врати резултатски во мечот. Во победата на МКК Куманово над Работнички, најефикасен беше Алекса Стевановиќ со 26 поени а Урош Луковиќ имаше 15 поени и 13 скока. Кај Работнички се издвои Рикиќ со 30 поени и 11 скока. Во последното коло, МКК ќе игра против тимот на Феникс 2010. 

Ракометарите на МРК Куманово, пак, славеа на гостувањето кај Струга со 27:25 и со таа победа го потврдија опстанокот во суперлигашкото друштво. Кумановци одиграа цврст натпревар во важен момент од сезоната и со бодовите од Струга го заверија својот статус и за следната година. Во ракометниот триумф над Струга, прв стрелец на МРК Куманово беше Ончев со 10 гола, а Мамду постигна 6. Кај Струга, најефикасен беше Костов со 6 погодоци.

Единствениот пораз го претрпеа ракометарките на ЖРК Куманово, кои на домашен терен загубија од лидерот Ѓорче Петров со 24:43. Иако противникот ја оправда фаворитската улога, кумановки остануваат во горниот дел од табелата во Супер женската лига.