×
  • Насловна
  • Вести
  • Регион
  • Македонија
  • Спорт

  • Видео

  • Колумни
  • Интервју

  • По допрен глас
  • Репортажи
  • Ретроспектива

  • Погранична хроника
  • Фото вест - Ваша пошта!

  • Дезинформации
  • ПРОВЕРКА НА ФАКТИ:КОВИД-19
  • Проверка на факти: реформи кон ЕУ

  • Контакт
  • Политика на приватност
  • Импресум
  • Маркетинг стратегија
  • Понуда за рекламирање

  • Авионите не предизвикуваат ковид-19 и не нè прскаат со хемикалии

    17.11.2021 08:07 | KumanovoNews | Преземено од: vistinomer.mk

    Не е првпат да се манипулира со позната теорија на заговор наречена „Кемтрејл“, според која од небо „нè прскаат со хемикалии“, па во тој дух се тврди дека белата трага што ја создаваат авионите во воздухот се „хемиски патеки“, составени од хемиски или биолошки агенси за „злобни цели“. Ваквите тврдења се категорично отфрлени од научната заедница. Белата патека што ја оставаат авионите во воздухот се нарекува „контрејл“ – скратеница од condensation trail, односно патека од кондензација. Облаците во форма на линија се произведени од издувните гасови на моторот на авионот и настануваат поради промени во притисокот на воздухот, обично на авиони кои летаат на височина неколку километри над површината на Земјата

    Авионите не предизвикуваат ковид-19 и не нè прскаат со хемикалии Фото: pixabay.com

    Објава на социјалната мрежа Фејсбук користи невистини и сензационализам за да ја манипулира јавноста со непотврдени и недокажани информации кои се, всушност, теории на заговор. Се тврди дека трагите кои на небото ги оставаат авионите се хемиско биолошко оружје кое го распрскуваат авионите на Обединетите нации, што е нелогична бесмислица.

    Македонија синоќа беше силно атакувана со хемиско биолошко оружје од авионите на ООН…

    Очекувам министерот за смрт да се јави со нови бројки.

    Оваа вирална објава, на којашто се прикачени четири фотографии од белите траги кои ги оставаат авионите, некако успева да ги поврзе овие бели траги со коронавирусот. Напишаното нема каква било логика, па  се вели дека министерот за здравство, Венко Филипче по овие прелети на авиони, ќе јави за нови бројки на заболени од ковид-19!

    Бројки на заболени има секој ден од почетокот на пандемијата со коронавирусот која беше прогласена во март 2020 година. Нивниот раст или пад не зависи од никакви авиони, туку од многу други фактори, како што се степенот на вакцинација на населението и (не)воведувањето на мерки за спречување на ширењето на вирусот и нивно (не)почитување.

    Ковид-19, болеста која ја предизвикува коронавирусот, не е измислена туку постои. Вирусот примарно се шири преку капки на плунка или секрет од носот на заразена личност, кога таа личност ќе кивне или ќе кашла на растојание помало од два метри. Тоа значи дека тврдењето дека ковид доаѓа од авионите кои летаат на огромна височина е бесмислено и нелогично.

     

    Белите траги од авионите не се хемиски патеки

    Ова не е првпат да се манипулира со белите траги кои ги оставаат авионите – позната теорија на заговор дека авионите „нè прскаат со хемикалии“, во светот наречена „Кемтрејл“.

    Изразот е скратеница од англиските збори chemical и trail односно хемикалија и патека. Теоријата на заговор за „кемтрејл“ го преставува верувањето  дека патеката односно белата трага што ја создаваат авионите во воздухот се „хемиски патеки“, составени од хемиски или биолошки агенси за „злобни цели“. , Ова, се разбира е неточно

    Оние кои веруваат во оваа теорија на заговор сметаат дека патеката што е подолго време видлива мора да содржи дополнителни супстанции односно дека нормалната трага од авионот треба брзо да се распрсне, така што облаците кои не исчезнуваат веднаш мора да бидат полни со дополнителни, неоткриени супстанции.

    Со оваа шпекулативна теорија се тврди дека ваквото хемиско прскање се случува за повеќе цели, како контрола на сончевото зрачење, модификација на временските услови, психолошка манипулација, контрола на човечката популација, биолошка или хемиска војна, тестирање на биолошки или хемиски агенси врз популацијата, како и дека патеките предизвикуваат респираторни заболувања и други здравствени проблеми.

    Ваквите тврдења се категорично отфрлени од научната заедница. Нема никакви докази дека наводните хемиски патеки се нешто различно од нормалните, вообичаени траги од вода кои ги оставаат авионите кои летаат на голема височина под одредени атмосферски услови.

    Група од 77 научници објавија извештај откако ги прегледаа наводните докази за дека некои авиони не прскаат со хемиски супстанци.  Од тие 77 научници, 76 изјавија дека не нашле докази за „тајна атмосферска програма од големи размери“. Со други зборови, доказите укажуваат на тоа дека патеките се очекуваниот резултат на авионите што летаат во воздухот.

    Белата патека што ја оставаат авионите во воздухот се нарекува „контрејл“ – скратеница од condensation trail односно патека од кондензација. Облаците во форма на линија се произведени од издувните гасови на моторот на авионот и настануваат поради промени во притисокот на воздухот, обично на авиони кои летаат на височина неколку километри над површината на Земјата. Патеките се составени од вода, во форма на кристали од мраз. Во зависност од температурата и влажноста на воздухот, тие можат да бидат видливи само неколку секунди или минути, или може да опстојуваат со часови и да се шират на неколку километри.

     

    „Хемиско биолошко оружје“?!

    Во објавата се тврди дека авионите не напаѓаат со „со хемиско биолошко оружје“ и тоа ни помалку ни повеќе туку дека станува збор за авионите на Обединетите нации. Ова исто така нема допирна точка со реалноста. Нема никакви докази дека авионите кои го прелетувале македонското небо се во сопственост на Обединети нации и дека испуштале било какви реагенси врз населението.

    Освен тоа не постои нешто како „хемиско биолошко оружје“. Или е хемиско или е биолошко оружје, не може да е двете во едно.

    Хемиско оружје е секоја токсична хемикалија која може да предизвика смрт, повреда, онеспособеност и сензорна иритација, испорачана до одредена цел преку употреба на артилериска граната, ракета или балистичка ракета. Хемиското оружје се смета за оружје за масовно уништување и неговата употреба во вооружени конфликти е кршење на меѓународното право.

    Примарните форми на хемиско оружје вклучуваат нервни агенси, агенси за задушување и агенси за крв. Овие агенси се категоризираат врз основа на тоа како тие влијаат на човечкото тело.

    Нападот со хемиско оружје се случува во две фази: испорака и ширење. Фазата на испорака се однесува на лансирање на ракета, бомба или артилериска граната. Фазата на дисеминација вклучува растурање на хемискиот агенс од оружјето.

    Биолошко оружје се микроорганизми како вируси, бактерии, габи или други токсини кои се произведуваат и се ослободуваат намерно за да предизвикаат болести и смрт кај луѓето, животните или растенијата.

    Биолошките агенси, како антракс, ботулински токсин и чума, можат да претставуваат тежок предизвик за јавното здравје, предизвикувајќи голем број смртни случаи за кратко време, додека е тешко да се сопрат. Биотерористичките напади може да резултираат и со епидемија, на пример ако вирусите ебола или Ласа се користат како биолошки агенси.

    Оваа објава има за цел преку измислици и теории на заговор да ја заплашува јавноста и притоа да ја убедува дека бројот на заболени од ковид-19 зависи од авионите кои прелетуваат, а не од вистинските причини кои предизвикуваат на пандемијата сè уште да не ѝ се гледа крајот.

     

    Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар