Зачленете се во нашиот клуб на читатели и најновите текстови ќе ги добивате на вашата мејл адреса
ВЕТУВАЊЕ: Во првите 82 дена за граѓаните ќе биде воведена 24 часовна канцелариска служба и служба за брза реакција на нивен повик. Следно е отворање на телефонска линија за барања и помош на граѓаните.
[Извор: Канал 5; Датум: 15.10.2021 г.]
Фото: commons.wikimedia.org
На 15 октомври 2021 година – за време на предизборната кампања за локалните избори, тогашната кандидатка за градоначалник на Скопје и актуелна градоначалничка, Данела Арсовска, во сетот проекти за коишто кажа дека ќе бидат реализирани во првите 82 дена од доаѓањето на функцијата, вети и формирање на служба за брза реакција, како и телефонска линија за помош на граѓаните. Станува збор за ветување кое се однесува на потребите на скопјани за услуги од различни сектори, а коишто граѓаните ќе може да ги добиваат од една канцеларија, без да „лутаат“ во административните лавиринти кога има интервентна ситуација.
Во првите 82 дена од мојот мандат, преку програмата за модерно Скопје со сите 15+1 проекти и мојот 82 акционен план ќе ги исчистиме дивите депонии во градот. Ќе го промениме линискиот ред на градскиот сообраќај каде ќе се обезбедат помали временски интервали за автобусите и продолжување на линиите до заборавените места, а редовни ноќни линии ќе бидат воведени, посебно за време на викендот. Следно е отворање на телефонска линија за барања и помош на граѓаните. Ќе се формира и Зелениот градски совет во соработка со невладиниот сектор. Водно преку иницирање предлог закон ќе биде прогласена за заштитена парк шума. За граѓаните ќе биде воведена 24 часовна канцелариска служба и служба за брза реакција на нивен повик, кажа Арсовска на 15 октомври 2021 година.
Според најавите, овие проекти се дел од преземањето активности за овозможување ефикасно и ефективно работење на градската администрација, со цел Скопје да биде функционален град кој нуди брзи, квалитетни и навремени услуги за скопјани.
На 22 јануари 2022 година, во рокот кој е предвиден согласно ветените 82 дена, Град Скопје на својата официјална веб-страница објави дека формира 24 часовна служба за брза реакција на повик на граѓаните.
Првиот спроведен чекор од формирањето на оваа служба е таа кадровски да се екипира, што според најавата, веќе се случува.
Град Скопје формира 24 часовна служба за брза реакција на повик на граѓаните. Од страна на Градот назначени се одговорни лица кои секторски ќе одговараат на барањата на граѓаните, а дополнително се екипира и служба за брзи реакции составена од претставници од сите јавни претпријатија во надлежност на градот, кои ќе делуваат со цел брзо и ефикасно решавање на предизвиците со кои се соочуваат граѓаните, објави Град Скопје на својата веб страница.
Имајќи предвид дека не е објавен телефонскиот број на којшто може да се дојде до оваа служба, не се прецизирани нејзините надлежности и кои сектори во неа ќе учествуваат, проектот не може да се смета за целосно завршен. Меѓутоа, со оглед на фактот дека Градот веќе назначил одговорни лица кои секторски ќе одговараат на барањата на граѓаните, се работи и на екипирање на службата за брзи реакции во која ќе учествуваат претставници од сите јавни претпријатија во надлежност на градот, оценуваме дека реализацијата на ова ветување на Арсовска, е ,,во тек”.
Со оглед на тоа што истекуваат 82 денови во кои беше предвидено целосно да се заврши ова предизборно ветување, „Вистиномер“ наскоро ќе се наврати за да ја провери неговата имплементација.
Оцени: Мирослава Бурнс
Овој напис е изработен во рамките проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Зачленете се во нашиот клуб на читатели и најновите текстови ќе ги добивате на вашата мејл адреса
