Дете падна од балкон во напуштениот Пионерски дом во Куманово

„Детето повредите ги здобило при пад од тераса во запуштен објект на улицата „Кирил и Методиј“ во Куманово. Се преземаат мерки за расчистување на случајот“, соопшти полицијата.

Увид извршила екипа на СВР Куманово.

Поранешниот Дом на пионери е во сопственост на Министерството за труд и социјална политика, а во 2018 година приземјето беше преадаптирано во детска градинка. Иако тогаш беше најавена реконструкција на целиот објект, тоа никогаш не се реализира. Напротив, зградата остана незаштитена и стана мета на крадци – беше однесено сè што можеше да се демонтира, па денес останаа само голи ѕидови.

Некогашното омилено катче за детско творештво денес е руина преполна со смет и шут, засолниште за бездомници и корисници на наркотични средства, и претставува сериозна закана за безбедноста и здравјето на граѓаните.

Состојбата во која се најде Пионерскиот дом е директна последица на неодговорното и недомаќинско однесување на надлежните институции. Општина Куманово уште пред десетина години го бараше објектот – најпрво од владата предводена од ВМРО-ДПМНЕ, а подоцна и од СДСМ, но и во двата обиди не успеа.

Наместо да се стави во функција на граѓаните, делови од објектот се издаваа на приватни фирми, телевизии и угостителски објекти, по што практично започна неговото пропаѓање и уништување, пред очите на целата кумановска јавност.