Државата ќе помогне да се реконструира спортската сала во Куманово

Одлуката дека државата ќе помогна да се врати во живот спортскиот објект го најави премиерот, а го потврди градоначалникот.

„Значаен проект е спортската сала, за која се потребни од 600 до 800.000 евра за да се реконструира, затоа што спортот е многу важна работа и државата треба да помогне“, - кажа премиерот Заев на трибина во Куманово.

„Добивме ветување дека ќе бидат обезбедени средства од Владата за реконструкција на спортската сала. Проектот е во завршна фаза, го очекуваме идејното решение т.е. 3Д визуелизацијата, откако ќе биде претставено на јавноста и откако ќе ја добиеме пресметката ќе се обратиме до Владата, која вети дека финасиски ќе учествува во овој проект“, - изјави Димитриевски.

Изработката на проектот чини 2,2 милиони денари, а се финансира со пари од локалниот буџет.

Спортската сала во Куманово е изградена 1980 година и има капацитет од 4.150 седишта. Проектирана е од архитектите Трајко Димитров и Живко Гелевски во 1979 година, а зградата ја добила големата награда на Биеналето на Македонската архитектура (БИМАС) во 1981 година.

Салата е најголемата затворена спортска сала во Куманово, каде се одржуваат кошаркарски, ракометни, футсал, одбојкарски и боксерски натпревари.

Но, последните дваесетина години салата се наоѓа во очајна состојба. Кровот протекува, поради што се подигна паркетот и повеќе не се играат државните натпревари во неа. Целиот објект е руиниран, трибините се оштени и потребна е итна реконструкција за се врати функцијата за која е изградена.

Општината планира да ги преземе сите спортски објектите и да стопанисува со нив, откако ќе бидат раскинати договорите со сегашните концесионери.