„И учен и стручен“ мото на техничкото училиште „Наце Буѓони“

Неколку високо образовни установи од Скопје, Штип и Куманово, како и домаќинот техничкото училиште „Наце Буѓони“ вчера пред матурантите и полуматурантите од Куманово ги претставија своите програми за упис во новата академска и учебна година. Mанифестацијата „Техничкиот саем“, се организира шеста година по ред, а има за цела да им помогне на идните средношколци при изборот на професијата и да ги покаже достигнувањата на учениците од областа на роботиката, биологијата и машинството.

„Задоволни сме од одзивот, бидејќи тука се претставници од сите основни училишта од општините Куманово и Старо Нагоричане. Дојдоа најдобрите ученици од областа на природните науки и техничкото образование, како и од спортот. Што значи дека оваа манифестација добива и во своето значење и на масовноста. Се поголем и поголем број на училишта се заинтересирани она што го направиле во текот на оваа учебна година да го презентираат овде, за да го видат сите присутни, - изјави Лидија Михајловска, директор на техничкото училиште „Наце Буѓони“, организатор на саемот.

Манифестацијата доби подршка од Секторот за образование на Општина Куманово и неколку приватни претпријатија.

По разгледување на штандовите, претставниците на училиштата и бизнис заедницата одржаа трибина на која се расправаше како да се развива образованието и соработката помеѓу бизнис секторот и училиштата.  

„Нам ни е потребна поддршка од бизнис секторот со цел да направиме добра и успешна соработка и нашите ученици да бидат стручни и компетентни кога ќе излезат од образованието. Во последно време се спроведува една реформа во Македонија која се нарекува „И учен и стручен“, самото тоа многу кажува за вештините и знаењата што треба да ги поседуваат нашите ученици кога ќе се вклопат во пазарот на трудот. Тоа не можат да го направат ако практичната настава не е квалитетна, а може да ја обезбеди само претпријатие што има современи машини и кадар, кој ќе биде ментор на учениците, - додаде Михајловска.

Учениците се натпреваруваа во повеќе дисциплини, а најдобрите беа наградени.

На „Техно саемот“, пред матурантите беа претставени програмите за студии на Електротехничкиот факултет, Машинскиот факултет и ФИНКИ од Скопје, Универзитетот „Гоце Делчев“ од Штип и Еуроколеџ од Куманово.

Саемот, се организираше вчера во пресрет на Денот на сесловенските просветители, браќата „Кирил и Методиј“.