Зачленете се во нашиот клуб на читатели и најновите текстови ќе ги добивате на вашата мејл адреса
Куманово повторно е на врвот на листата со новозаболени од коронавирус во државата. Во изминатите 24 часа во Центарот за јавно здравје во Куманово откриени се нови 26 нови случаи позитивни на ковид-19. Од нив 24 се од Куманово и двајца од Липково.
„Станува збор за различни групи на граѓани кои извршуваат различни професии. Меѓу нив и еден лекар од Кумановската болница. Најмалиот заразен е на 12 годишна возраст, а најстариот на 83 години. Причината за големиот број на новозаболени е од тоа што никој не ги почитува мерките, никој не носи маски ниту држи дистанца и ние очекувавме дека ова ќе се случи“, вели Ариф Љатифи, директор на Центрот за јавно здравје во Куманово.
Зголемениот број на новозаболени во кумановско-липковскиот регион се должи и на тоа што не се почитува забраната за организирање на свадби и други прослави, кои се прават дома, но и во рестораните. Се очекува дека состојбата дополнително ќе се влоши откако ќе се вратат од одмор граѓаните кои беа во туристичките места во државата и надвор од неа.
Во Куманово во изминатото деноноќие нема оздравени пациенти.
Вкупната бројка на ковид дијагностицирани во нашата земја од почетокот на епидемијата изнесува 12840, бројката на оздравени пациенти е 9361, на починати е 547, а во моментов бројот на активни случаи во земјата изнесува 2932.
Зачленете се во нашиот клуб на читатели и најновите текстови ќе ги добивате на вашата мејл адреса
