Над 1000 кумановци дадоа подршка на лицата со попреченост

Големиот одзив на првиот ден ги изненади и организаторите, кои велат дека особено ги радува што добиле подршка од младите луѓе.

„Искрени да бидеме не очекувавме толку голем одзив, но се гледа дека граѓаните не подржуваат и тоа ни дава волја да продолжиме понатаму, каде што поради тешкотиите родителите застануваат. Имавме можност да видиме дека не подржуваат политичарите и претставници на локалната самоуправа. Ние ќе продолжиме понатаму и нема да се откажеме, но оваа иницијатива ќе ја застапуваме и во новоформираната влада кога и да се формира„- изјави Благица Димитровска од здружението „Инклузива“.

Граѓаните кои се потпишуваа, едногласни се дека лицата со попреченост ги немаат правата коишто им следуваат и бараат Собранието под итно да ги прифати измените на законот и подзаконските акти, кои ги предлагаат родителите, за да се подобри здравствена и социјална заштита на оваа категорија граѓани.

 „Состојбата во здравството е за никаде. Пред месец дена министерот излезе со соопштение за дијабетичарите, кои се исто во многу тешка состојба, и кажа дека буџетот за оваа година е скратен за 10 отсто. Мора да се направи притисок врз надлежните за да овие лица ги добијат своите права, да се лекуваат и живеат. Оваа категорија на луѓе живее со нас, тие не се посебни тие се исти како нас, треба да живеат во заедницата со нас, - изјави Никица Кипријановски.

Во Куманово има регистрирано околу 1000 лица со попреченост, но луѓето кои се во оваа проблематика тврдат дека нивниот број е многу поголем. Светската статистика покажува дека околу 15 проценти од вкупното населние отпаѓа на лицата со попреченост.

Родителите на децата со посебни потреби бараат бесплатни прегледи и лекување, право на посебен додаток, отворање на дневни центри и подобра иднина на децата по нивната смрт.

Акцијата за собирање потписи на Градскиот плоштад во Куманово ќе трае до петок во периодот од 12 до 17 часот.