Над 250 граѓани од Куманово добија ваучери од 28.000 денари за инвертер-клими

Вкупно 4.070 граѓани во земјата ќе добијат ваучери во вредност до 28.000 денари. Во Куманово со ова право се стекнале 258 граѓани, во Липково 79 и во Старо Нагоричане 9. Ваучерите можат да ги подигнат во меѓуопштинските центри за социјална работа во општината во која живеат.

Списокот на граѓани кои стекнале право, како и списокот на компании, се достапни на веб-страницата на Министерството.

Ваучерот овозможува набавка и вградување инвертер-клима уред со моќност од 3,5 киловати и најмалку енергетска класа А+, а може да се искористи најдоцна до 15 октомври годинава.

„Станува збор за втора фаза од веќе завршената постапка, во која право на поддршка имаа исклучиво домаќинствата што најдоцна до 5 октомври 2025 година поднеле барање, доставиле комплетна документација и ги исполниле условите утврдени во програмата за заштита на ранливи потрошувачи на енергија“, информира МЕРМС.

На веб-страницата на Министерството за енергетика, рударство и минерални суровини (МЕРМС) се објавени сите детали за потребната документација и постапката за подигнување, како и списокот на компании со кои се склучени договори, каде што граѓаните ќе можат да ги набават уредите користејќи го ваучерот.