Над 300 тони ѓубре исчистено од дива депонија покрај Куманово

Во чистењето се преклучи и механизацијата на ЈП „Чистота и зеленило“ и Општина Куманово, кои подигнаа  и отстраниа 27 приколки од камион и  трактор најразличен отпад, кој несовесните граѓани го фрлаат покрај патот.

„ Ова депонија е со цврст отпад и шут, меѓутоа за мотивација и за старт почнавме од тука. Кумановци живеат во ѓубре, кое секојдневно самите го создаваат. Ниту 100 јавни претпријатија не можат да исчистат колку граѓаните можат да извалкаат и да ја загадат животната средина. Затоа ова лето „Не биди ѓубре“ - кумановска параформација, ќе биде цело лето активна и ќе правиме напори секоја викенд да исчистиме по едно вакво место во општината се додека не проработи свеста кај граѓаните“, - изјави активистката Андријана Недељковски, иницијатор на акцијата.

„Ова е прва наша акција што ја организираме и се надевам дека нема да биде и последна. Очекувам дека на наредните акции ќе има повеќе луѓе и ќе помогнат да го исчистиме ѓубрето коешто со години се собирало на овие локации. Лошо е што сме навиканати на толку ѓубре и дури и не ни пречи, не го забележуваме. При ваквите акции и со постирање на слики на Фејсбук, луѓето ќе имаат повеќе мотив да се приклучат на акциите“, - изјави активистката на „Не биди ѓубре“ Јован Спасиќ, студент на ФДУ во Скопје.

Од депонијата екологистите извадија гуми, пластики, облека и друго ѓубре, а со механизација се подигаа купиштата истурен шут. На акцијата учествуваа само десетина волентери, а повторно изостана масовно присуство на граѓаните кое се најавуваше на социјалните мрежи. Поддршка дадоа градоначалникот и директорот на „Чистота“.

„Одзивот на оваа акција всушност покажува зошто ние живееме во ѓубре. На мојата објава на Фејсбук имаше стотина луѓе кои се пријавија дека ќе дојдат, а само десетина се тука. Тоа е процентот на колку им значи животната средина и колку се подготвени вистински да помогнат. Сите се работоспособни млади луѓе, кои денеска во сабота наутро можеа да дојдат и да одвојат два часа побрзо да се заврши работата, да направат нешто добро за себе и својоат град, пред се. Ние сме луѓе со сеуште не развиен осет за животна средина, за култура, за екологија “, - додава Недељковски.

Оваа е прва акција на граѓанската иницијатива „Не биди ѓубре“ во Куманово, каде што има голем број на диви депонии. Дел од нив редовно чистат и несовесните граѓани повторно ги создаваат.