Не работи семафорот кај „Автобуска“, со денови никој не го поправа

Иако ова е една од најфреквентните крстосници во градот, на семафорот трепка само едно од светлата, а никој од надлежните не го гледа метежот во сообраќајот што секојдневно се создава. Граѓаните и возачите се револтирани поради ваквата состојба.

„На оваа раскрсница е хаос и кога работи семафорот, а не сега кога е исклучен. Проблем е исклучувањето и вклучувањето од улицата „Октомвриска револуција“, никој не ги почитува правилата и сака што побрзо да помине па цел ден  има невидена нервоза и гужва“, - велат возачите.  

Од општина Куманово не знааат зошто семафорот не е во функција. Доколку трепка само едно од светлата претпоставуваат дека го исклучила полицијата. Општината има ангажирано фирма за одржување на семафорите во градот, но тие интевренирале само доколку семафорот е расипан и воопшто не работи.

Од сообраќајната полиција во СВР Куманово велат дека тие не го исклучиле семафорот, а доколку  имаат потреба за такво нешто ја известуваат Општината. Велат дека тие имаат улога на надзорен орган, кој пријавува кога има проблеми со сообраќајната сигнализација во градот, а општината и фирмата за одржување го решаваат проблемот.