Од денеска градоначалниците ќе одат на работа, но нема да потпишуваат документи

Градоначалникот на Куманово Зоран Дамјановски вели дека со администрацијата ќе продолжат да ги извршуваат секојдневните обврски, со цел да не се блокира работата на општината и да го заштитат јавниот имот на граѓаните, но нема да потпишуваат документи ниту, пак,  да ги користи општинските пари.

 „ Од денеска ќе бидат блокирани средствата од блок дотациите, социјалниот трансфер, културата,  промет на недвижности, субвенциите за јавните претпатијата, плаќање на сметките електрична енергија, јавното светлување, превозот на ученици и сите фунцкии кои ги врши општината како логистика на јавните установи ќе бидат доведени во прашање. Затоа апелирам уште еднаш што побрзо да се најде решение за проблемот“ – изјави Дамјановски.

„Работата на локалните самоуправи сега е под знак прашалник. Затоа повикуваме прашањето за локалните избори да биде приоритетно. Не мора да се чека избор на нова Влада за да се распишат изборите и донесат законите“,- вели претседателот на ЗЕЛС и градоначалник на Скопје, Коце Трајановски.

Парламентарните партии вчера се договорија локалните избори да се одржат на 15. октомври, до кога треба да биде продолжен мандатот на градоначалниците и советите, за што се потребни измени во Изборниот законик.