Oколу 800 Французи ќе пристигнат во Крива Паланка

Тие ја одбраа Крива Паланка како место познато по своите активности во областа на Франкофонијата.

Во 16 часот во дворот на ООУ „Јоаким Крчовски“ ќе се одржи франкофонски музички хепенинг, а подоцна во 20 часот гостите ќе ја проследат културно-уметничката програма на градскиот стадион.

Во рамки на Еуроп-Раид 2019, 260 екипажи со возило „пежо 205“, тргнаа од Париз на 27 јули, во духот на меѓународната солидарност, носејќи со себе 17 тони училишна опрема која ја донираат на училишта од Босна и Херцеговина до Бугарија, преку Албанија и Северна Македонија.

Поминувајќи 10.000 километри за 22 дена, секоја екипа има мисија да понесе најмалку 100 кг училишна или спортска опрема: училишни торби, тетратки, листови, моливи, топки, играчки…  „Еуроп-Раид“ сака да им помогне на  деца кои немаат пристап до училиште или живеат во неповолни услови.

Во рамките на оваа активност, францускиот амбасадор во земјава Кристијан Тимоние ќе оствари средба со градоначалникот на Крива Паланка, Борјанчо Мицевски.