Отворен саем на книга во библиотеката

Во наредните три дена граѓаните ќе можат по пристапни цени да набават книги од оваа издавачка куќа. Паралелно ќе има и промоции за популаризација на книгата меѓу читателите.

“Матица Македонска“ подготви еден мини саем, денеска на 23 април - Светскиот ден на книгата и авторското право. Драго ми е што ве гледам во ваков голем број и јас не се грижам за книгата. Иако велат дека има игри, интернет, книгата е незаменлива и овој настан тоа го потврдува“ - рече Нада Ивановска, директорка на библиотеката.

Пред присутните се обрати раководителот на секторот за култура во општина Куманово, Жика Крстевски кој кажа дека ова е убава манифестација на отворено каде децата ќе се доближат до книгата.

Гледаме дека има присутни и ученици и наставници, гости, претставници од фелата на писателите. Ова е уште еден момент, книгата да ја приближиме до читателите, меѓутоа и да пратиме сигнал дека Куманово е град кој ги прифаќа оние кои сакаат да го збогатат културниот живот  - изјави Крстевски.

Дејан Павлевски, директор на “Матица Македонска“ објасни дека кампањата се реализира во градовите низ Македонија.

Колку повеќе зборуваме за книгата и колку повеќе се дружиме со книгата, толку подобро општество ќе имаме. Идејата е во градот каде гостуваме да ги вклучиме и авторите кои тука живеат и творат  - вели Павлевски.

Голем број граѓани ги посетија штандовите поставени пред библиотеката за да си одберат книга.