Отворена изложбата на скутини во Центарот за култура во Куманово

На изложбата се претставени петнаесетина скутини, како највпечатлив и централен детал на носијата не само кај женската туку и машката облека.

„Во период кога традицијата е на изумирање мора да бидат елиминирани стеротипните форми на нејзина презентација преку современи техники и методи за да се доближи до поширокиот аудиториум. Вредноста на скутината-историска, научна, уметничка јас секако ја знам, но од особена важност е да се пренесе и да стигне до пошироката публика“, вели авторот Петковски.
 

На изложбата скутината е претставена преку фотографии, кои се поставени така да може да се добие вистинска претстава за тоа како изгледале скутините и целокупниот визуелен изглед на носијата. На самите фотографии се прикачени експонатите - фути изработени со традиционални, народни техники со што авторот се потрудил да креира изглед најсличен на оригиналот.

Изложбата „Скутина, фота, бовча, диљка“ беше пропратена со сценско - уметнички перформанс од вокални напеви од етничките предели Источен дел на Славиште и Дурачка Река. Музичката точка беше изведена на кавал и две воклани солистки.

Проектот е поддржан од Министерството за култура, како проект од национален интерес и од Центарот за кулура, постојани партнери на младинскиот активизам и прогресивните уметници.