Реновирани канцелариите на Пазарната инспекција

 Со реконстрикцијата се опфатени 250 метри квадратни деловен простор, вложени се над 70.000 евра , средства обезбедени од турската невладина организација ТИКА.

„Просториите се целосно реновирани, од подовите, преку електричната инсталација, прозорците, вратите и санитарните јазли. Обезбеден е и нов канцелариски мебел, клима уреди, компјутери и принтери. Направен е и нов распоред на просториите, а новина е што ќе имаме посебна канцеларија за инспекторите каде ќе ги примаат странките, со што ќе се исполни барањето на граѓаните за анонимност и дискретност при пријавување на случаите. Исто така за првпат имаме архива каде што електронски ќе се водат сите пријави и случаи, а двојно е зголемен и магацинскиот простор, - изјави Рами Емини, раководител на Пазарната инспекција.

Тој додава дека новите работни простории се по европски стандарди, поради што за сто отсто ќе се зголеми квалитетот на работењето, а се обезбедува дискретноста и безбедноста при работата. Одделението денеска ќе добие и две возила од Инспекторатот за работа на терен.

Во Одделението за инспекциски надзор Куманово, вработени се 8 инспектори, а по систематизација треба да бидат 12. Покрај подобрување на условите за работа од Пазарниот инспекторат се надеваат дека наскоро и кадровски ќе зајакнат и ќе се подмладат, бидејќи вработените во одделението се на горната старосна граница и пред пензија.