Зачленете се во нашиот клуб на читатели и најновите текстови ќе ги добивате на вашата мејл адреса
Советот за безбедност ќе и предложи на Владата да прогласи кризна состојба на целата територија на Република Северна Македонија во траење од 30 денови, изјави претседателот Стево Пендаровски по денешниот состанок со министерот за здравство Венко Филипче и премиерот Зоран Заев, на кој се дискутираше за состојбата со пандемијата на ковид-19.
Пендаровски појасни дека воведувањето ваква кризна состојба нема никаква врска со воведување полициски час, ниту какви било други рестриктивни мерки.
- Воведувањето на кризната состојба на целата територија нема никаква врска со т.н. полициски час и евентуално воведување на рестрикции во движењето на граѓаните. Тоа е во надлежност, прво на Комисијата за заразни болести, потоа на централниот кризен штаб и се разбира на крај, на Владата, ако така процени дека е неопходно, - рече Пендаровски и додаде дека кризната состојба е неопходна заради поголема поддршка на полицијата и армијата на здравствените институции.
Во кризна состојба Владата управува со ресурсите на органите на државната управа, на јавните претпријатија, на општините и на градот Скопје, но, тука вклучувајќи ги и трговските друштва, во овој случај приватните здравствени установи.
-Не станува збор за национализација на приватните болници, туку евентуално за управување со нив во битката против пандемијата, се разбира таму и во тој обем во кој Владата ќе процени дека е тоа неопходно. Инаку, знаете дека приватната сопственост е гарантирана со уставот и затоа тука не станува збор за национализација или некакво менување на сопственоста, - додаде Пендаровски.
Премиерот Заев кажа дека кризната состојба ќе биде прогласена најдоцна до утревечер.
Зачленете се во нашиот клуб на читатели и најновите текстови ќе ги добивате на вашата мејл адреса
