Во Куманово наврнаа 32 литри дожд на метар квадратен

Најголема количина врнежи во изминатите 24 часа е измерена во Скопје, каде на мерното место во Црешево наврнале 74 литри на метар квадратен, по што следуваат Лисиче со 63, Гази Баба со 44, Куманово со 32 и Крива Паланка со 29 литри на метар квадратен. Најмалку дожд се измерени во Виница, Маврови Анови и Ѓуриште – по 3 литри на метар квадратен.

Според информациите од Центарот за управување со кризи (ЦУК), поројниот дожд предизвика поплавување на подрумски простории на улиците „Моша Пијаде“, „Октомвриска револуција“, „Бајрам Шабани“, „Трета МУБ“ и „11 Октомври“.

Вода навлегла и во објекти на улицата „Веселин Маслеша“, како и во деловен објект на улицата „Гоце Делчев“. Поплавување било пријавено и на улицата „ЈНА“, во близина на ЛП Плаза, а до надлежните служби пристигнале пријави и од други локации низ градот.

Екипи на Општина Куманово, Територијалната противпожарна единица (ТППЕ) Куманово и јавните комунални претпријатија интервенираа на терен, испумпувајќи ја водата и санирајќи ги последиците од невремето.

Според прогнозата на УХМР, и денеска попладне се очекува променливо облачно и нестабилно време со повремени врнежи од дожд, грмежи и засилен ветер. Локално ќе има услови за краткотрајно невреме проследено со пообилен пороен дожд и појава на град.