Задолжителна вакцинација за вработените во јавниот сектор и за здравствените работници, предлага Комисијата за заразни болести

17.11.2021 11:43 | Сузана Николиќ

Задолжителна вакцинација против ковид-19 за здравствените работници и препорака за вакцина за вработените во јавниот сектор и локална самоуправа за да може да одат на работа, предлага Комисијата за заразни болести. 

Задолжителна вакцинација за вработените во јавниот сектор и за здравствените работници, предлага Комисијата за заразни болести

„Сите вработени во јавниот сектор, локалната самоуправа, сите институции за одење на работно место да прикажат потврда за најмалку една примена вакцина или да имаат ПЦР негативен тест кој ќе важи најмалку 72 часа, а ќе биде направен на сопствен трошок или ќе приложат потврда за прележан ковид-19, не постар од 45 дена или ќе имаат потврда од лекар специјалист дека вакцината не може да ја примат, а тоа се една од оние ретки имунолошки состојби за кои ние ќе излеземе со соодветна листа на болести и специјалисти кои тие потврди ќе може да ги издаваат“, соопшти министерот Венко Филипче, по состанокот со Комисијата за заразни болести, на кој беше донесена одлука за нови мерки, кои ќе бидат предложени до Владата.

Комисијата за заразни болести препорача и вакцинацијата да биде задолжителна за сите здравствени работници, а мерките денес предложени да стапат на сила 10 дена откако ќе ги усвои Владата за да граѓаните имаат време да се вакцинираат и 30 дена за оние здравствени работници коишто во овој момент се сеуште невакцинирани. 

Министерот Филипче изјави дека препораките се до овие мерки да се приклучат и приватните компании, со цел да се заштитат производствените капацитети и целокупниот економски процес во земјата.

„Бараме да се ажурура процесот за спроведување на контрола на здравствените сертификати, користејќи ги електорнските алатки на европските сертификати преку апликација којашто го прикажува вистинскиот QR код и ја контролира неговата валидност. Ова е мерка со којашто очекуваме значајно да се зголеми опфатот со вакцинацијата“,  изјави министерот Филипче.

2008 - 2021 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk