Нема докази дека мистериозна инјекција е одговорна за смртноста во старските домови во Англија

Причините за големата смртност во старските домови во Англија се комплексни и системски, а самото тоа што овие лица сместени во старските домови се во поодмината возраст, имаат коморбидитети ги прави најранливи да бидат жртви на ковид. Ако се погледне Извештајот на „Амнести Интернешнал“, кон овие фактори придонела и недоволно соодветниот одговор на здравствениот систем соочен со недостиг на тестови и заштитна опрема. Ниту еден официјален или неофицијален извор не посочува ,,мистериозна инјекција” како причинител на смртта на лицата во старските домови во Англија

Во Бразил 60 отсто од населението е целосно вакцинирано

Не е вистина дека многу малку од луѓето  во Брaзил се вакцинирани. Тоа може лесно да се провери на сајтот „Ourworldindata.org“, каде што може да се прочита дека повеќе од половина од населението на Бразил се вакцинирани, односно, администрирани се вкупно 297.960.460 дози вакцини. Целосно вакцинирана е 60 отсто од популацијата во оваа земја, а 76 отсто имаат примено прва доза вакцина против ковид-19

Трометамин не е лек за срцев удар, туку состојка што го продолжува животниот век на вакцината на „Фајзер“

Не е вистина дека состојката трометамин во вакцините на „Фајзер“ е штетна или дека е „лек за срцев удар“. Со додавањето на оваа состојка се продолжува животниот век на вакцината на „Фајзер“ откако таа ќе се одмрзне, правејќи ја достапна за складирање 10 недели пред да биде аплицирана, наместо досегашните 2 недели. Исто така, не е точно дека само вакцината за деца на „Фајзер“, има трометамин во својот состав, туку сите фајзерови вакцини против ковид, за сите возрасни групи, ја имаат оваа состојка

„Фајзер“ не вклучува трометамин во својата вакцина за да спречи срцев удар

Постот нецелосно ја информира јавноста, односно му недостига контекст. Точно е дека „Фајзер“ во вакцината за деца под 11 години ја додава состојката трометамин, но оваа состојка ја додава и во вакцините за тинејџери и возрасни. Не е точно дека трометаминот се додава за да се спречи срцев удар по примање на вакцината, туку за да се олесни нејзиното одржување и траење. Трометамин има и во вакцината на „Модерна“, но и во други вакцини и лекови одобрени од ФДА

Вакцините против ковид не се експериментални

Вакцината на „Фајзер“ од август оваа година има трајно одобрение за употреба, кое што важи засекогаш. Европска агенција за лекови ги има одобрено вакцините на „Модерна“, „АстраЗенека“ и „Џенсен“, што може да се види на официјалната страница на ЕМА. Светската здравствена организација ја има одобрено вакцината на „Синофарм“ на 7 мај 2021 и досега таа се дава во 65 земји. И „Синовак“ има дозвола за употреба од СЗО која ја доби на 1 јуни 2021 година и се дава во 40 земји. Нашата држава ги следи препораките на СЗО, ФДА и на ЕМА, односно, тука се прифаќаат вакцините коишто се одобрени од светските релевантни медицински организации

Над 90 проценти од здравствените работници во охридско-струшкиот регион се вакцинирани

Нема лекар, вработен во јавните здравствени установи во охридско-струшкиот регион, кој не примил барем една доза вакцина. Рекордер во вакцинација е Специјалната болница за кардиоваскуларни заболувања во Охрид, таму има 100 отсто вакцинација на здравствените работници

Фејсбук објава шири дезинформација дека од вакцините се умира

Во нашата држава се аплицирани 1.662.152 дози на вакцини заклучно со 18.11.2021 година. Податоците од Министерството за здравство говорат дека 39 отсто од целата популација во нашата земја има примено вакцина против ковид-19, а 38 отсто од популацијата во државата примила две дози вакцина. Па, според конспирациската теорија којашто тврди дека вакцините предизвикуваат смрт на населението, ова би значело дека само во земјава треба да има значителен број на смртни случаи, кои во реалноста ги нема. Во постот се вели „од вакцините се умира и тоа како.“ Не се вели која е таа бројка, но, ако, „и тоа како“ се умира, тоа значи дека се умира многу, значи голем број смртни случаи, кои не би било можно да се прикријат од која било влада или организација

Дезинформација е дека ковид-19 не е дефиниран вирус

Фејсбук објава лажно тврди дека ковид-19 не е дефиниран вирус, туку дека станува збор за авиони кои прскаат отрови и живи вируси. Ова, се разбира, не е точно.

Коронавирусот е изолиран

Кина го изолира вирусот и го идентификува како коронавирус, а од 13 јануари ја сподели геномската секвенца со Светската здравствена организација. Веб-страницата на Американската национална библиотека за медицина, го објави целосниот геном од изолираниот вирус, земен во раните фази, како и неговата обновена верзија. Во научен труд во детали се објаснува како САРС-КоВ-2 е изолиран и колку е есенцијално ова изолирање за тестовите и за вакцините кои подоцна се појавија

Не е изваден чип од вакциниран човек во Русија

На видеоматеријалот што се споделува на Фејсбук нема ниеден момент и ниеден кадар што потврдува дека се вади чип од рамо на вакциниран човек. Дозата на вакцината е помала од еден милилитар, тоа не е доволен волумен во кој би можел да се вметне микрочип, дури и кога некој би посакал да направи такво нешто. Состојките на вакцините се позната и јавна информација и ниедна вакцина не содржи микрочип

Авионите не предизвикуваат ковид-19 и не нè прскаат со хемикалии

Не е првпат да се манипулира со позната теорија на заговор наречена „Кемтрејл“, според која од небо „нè прскаат со хемикалии“, па во тој дух се тврди дека белата трага што ја создаваат авионите во воздухот се „хемиски патеки“, составени од хемиски или биолошки агенси за „злобни цели“. Ваквите тврдења се категорично отфрлени од научната заедница. Белата патека што ја оставаат авионите во воздухот се нарекува „контрејл“ – скратеница од condensation trail, односно патека од кондензација. Облаците во форма на линија се произведени од издувните гасови на моторот на авионот и настануваат поради промени во притисокот на воздухот, обично на авиони кои летаат на височина неколку километри над површината на Земјата

Во вакцината против ковид нема ебола

Повеќе студии покажуваат дека вакцината против ковид-19 генерира зајакнувачки за имунитетот бели крвни зрнца, наречени Т клетки, специфични за ковид-19. Овие Т клетки помагаат имунитот систем да го организира одговорот и да ги убие клетките кои се инфицирани со вирусот ковид-19. Самиот производител „Џонсон и Џонсон“ гарантира дека нема да се заразите со ебола вирусот ако ја примите вакцината против ковид-19, наречена „Џенсен“, ниту пак, доклоку примите  вакцина против ебола

Фејсбук објава паушално тврди дека ковид е лага

Ковид-19, болеста која ја предизвикува коронавирусот е реалност, а тоа го потврдуваат секојдневните бројки на заболени и починати луѓе од вирусот низ целиот свет. Според последните податоци од СЗО, заклучно со 15 ноември 2021 година, во светот има вкупно  254.189.143 потврдени случаи, а бројот на починати е над пет милиони –  5.118.348. Кај нас од почетокот на пандемијата досега се регистрирани 209.277 заболени и 7.328 починати

Вакцините против ковид-19 имаат одобрение за употреба

Фајзеровата вакцина е одобрена во сите 27 земји членки на ЕУ од страна на Европската агенција за лекови (ЕМА). Истата агенција ги има одобрено вакцините на „Модерна“, „АстраЗенека“ и „Џенсен“. Ова одобрение за употреба на ЕМА трае една година. Од официјалната страница на ЕМА, може да се види дека за „Фајзер“ ова одобрение е продолжено на 3.11.2021 година, а за вакцината на „Астра Зенека“ е продолжено на 9.11.2021 година. На 7 мај оваа година Светската здравствена организација ја одобри вакцината на „Синофарм“, а на 1 јуни СЗО ја одобри и вакцината на „Синовак“

Не е точно дека 80 отсто од вакцинираните се на интензивна нега

Последната анализа на Министерството за здравство за периодот од 6 август до 4 ноември, покажува дека 72 отсто од заболените и 78 отсто од хоспитализираните со ковид-19 се невакцинирани. Повеќе научни анализи покажуват дека вакцините се безбедни и даваат резултати, штитат од тежок развој на болеста и спасуваат животи. Стручната јавност е децидна дека вакцинацијата треба да е што помасовна за да се постигне колективен имунитет и да се стави крај на пандемијата. Колективен имунитет се стекнува само со имунизација на поголемиот дел од населението – 70 до 90 отсто, во спротивно коронавирусот и натаму ќе се шири и ќе мутира, што, вусшност, и се случува

Директорот на „Фајзер“ е целосно вакциниран уште во март оваа година

Не е точно дека директорот на „Фајзер“, Алберт Бурла, сега во ноември откажал службено патување во Израел, зашто не бил вакциниран. Вистината е дека Бурла на почетокот март морал да го откаже патувањето за Израел, бидејќи тогаш не бил целосно вакциниран. Во тоа време имал примено само прва доза од „Фајзер“ вакцината, а на 10 март ја примил и втората доза и тоа јавно го објавил пред медиумите и светската јавност