Ќе ги вратиме спортските комплекси на граѓаните, вети Димитриевски

„Сакаме да порачаме дека ќе дадеме можност дополнително да се развива спортот во нашата општина. Ќе го решиме горливото прашања со спортската сала во средното училиште „Наце Буѓони“. Ќе ги преиспитаме сите одлуки и директно ќе учествуваме во решавање на судбината на сите спортски комплекси во Куманово, кои во моментов се дадени на концесионери од поранешните власти и дадени на користење, а во нив ништо не се инвестира“,- рече Димитриевски.

Тој истакна дека како идна власт ќе се вклучат во развојот на спортот и ќе побараат овие објекти да се дадат на општината, почнувајќи од Градскиот стадион, Соколана, спортска сала во Куманово и сите други фудбалски и спортски терени.

„На овој начин ќе им се даде можност на младите луѓе да дадат свој допринос за развој на спортот и малдите луѓе да водат здрав спортски живот. Но, нема да застанеме тука. Сакаме да продолжиме и со комплетно реновирање на Спомен- костурницата каде што планираме многу зелени површини, шеталишта, трим патеки и урбана опрема“- изјави Димитриевски.

Истакнатата атлетичарка и спортист на годината Матеја Ефремовска, рече дека е дел од советничката листа на СДСМ, затоа што верува дека ќе се подигне спортот на повисооко ниво и ќе се релизираат сите планирани проекти.

Димитриевски ја побара подршката на граѓаните, за да во соработка со Владата инвестираат во капитални инвестиции со цел да се промени животот и односот кон спортот во градот.