Ќе се уриваат нелегалните угостителски објекти, најави градоначалникот

Тој вчера кажа дека прво инспекциските служби ќе им наложат на сопствениците сами да ги отстранат објектите и урбаната опрема од јавните површини, а доколку тоа не се случи ќе ги урива општината.

„Имам намера во следниот период да ги преконролирам сите издадени решенија и да им укажам на сите коишто го прекршиле законот. Тоа значи дека овој објект што е зад вас еден ден ќе мора да се дислоцира доколку сопственикот не го дислоцира сам. Истото важи и за останатите угостителски објекти“, - изјави Димитриевски.

 Градоначалникот призна дека поголем дел на угостителски објекти во општината, спротивно на правилникот, имаат поставено урбана опрема на јавно-прометни површини во централното градско подрачје и надвор од него.

„ Многупати правилникот за поставување на урбана опрема е злоупотребен од страна на инвеститорите и не се почитува во целост. Треба да се постави урбана опрема со настрешноци, а наместо тоа се поставува инпровизирани врати прозорци и тоа дава лош изглед на самиот град. Комуналната инспекција согласно законските овластувања треба да ги нотира сите случаи и да им даде решение за отстранување на опремата, а доколку не ја отстранат комуналната инспекција ќе се поведе постапка за уривање“, - додаде Димитриевски.

Во Куманово во централното градско подрачје изразена е појавата за поставување на урбана опрема на зелени површини, тротоари и градскиот плоштад. Граѓаните се жалат дека тоа им го попречува нормалното движење, но никој не може да ги помести угостителите.