Ѓорѓиевски му честиташе на Димитриевски

Тој истакна дека ќе ја почитува вољата на граѓаните и порача новата локална власт да има чесен однос кон сите граѓани.

„Му честитам на победникот и на сите кои се чувствуваат себеси за победници и ги потсетувам дека Куманово е наш град, на сите нас и треба да имаат чесен однос кон сите граѓани, а тоа значи почит, толеранција и помагање на секој граѓанин.Сакам да се заблагодарам на сите граѓани, кои со својот глас на локалните избори донесоа одлука во каков град и во каква држава сакаат да живеат и јас таа одлука ќе ја почитувам. Не сакам да ги делам граѓаните на наши и нивни, бидејќи во своето живеење во овој град никогаш не сум ги делел„- изјави Ѓорѓиевски.

 Тој се заблагодари на своите соработници и активисти на ВМРО-ДПМНЕ и коалицијата „За подобра Македонија“ за нивниот несебичен ангажман и целосно вложување во оваа кампања, која по многу нешта била уникатна и специфична.

„Им се заблагодарувам и на она наше членство кое ја згази лојалноста, а даде приоритет на личниот интерес, пред националниот. Допрва ќе сме сведоци низ какви премрежја ќе поминува Куманово и Македонија, период на историски одлуки со кои треба да се сочува честа и гордоста да се биде Македонец со име и презиме, со самопочит кон себе и кон другите, - изјави Ѓорѓиевски, кој беше поздравен со аплауз од тимот соработници и идните советници,  на денешната прес-конференција.     

Тој жали што поголемиот дел од граѓаните не ја препознале неговата визијата за идно Куманово, која достоинствено ја презентирале во кампањата.