Формиран Совет за заштита на потрошувачите во Куманово

Советот брои 7 члена, три правни и четири  физички лица. Поддршката ја добија претставниците од фирмите: „Ми-мар“ од Куманово, „Адут ГВН“ од Тромеѓа и „Конект 2016“ Куманово, додека физички лица се: Тодор Тасев, Милорад Илиевски, Емин Ибраими и Мирослав Јакимовски. Функцијата не е платена и телото нема извршна моќ. Мандатот на членовите е 2 години.

 „Советот ќе ги разгледува прашањата и квалитетот на услугите, кои се во надлежност јавните претпријатија, општинските служби и локалните институции. Сите поплаки и преставки што ќе ги добие од граѓаните ќе ги разгледува на јавни седници на кои можат да присуствуваат градоначалникот, советниците, директорите и општинските службеници. Извештај за својата работа избраните членови ќе поднесуваат пред Советот на Општина Куманово, а ние ќе оценуваме дали тие квалитено си ја извршуваат задачата“ - изјави претседатeлот на Комисијата за мандатни прашања, избори и именувања, Томица Илиќ.

По формирањето членовите ќе изберат претседател, а граѓаните дополнително ќе бидат информирани за работните простории на телото.

Опозицијата смета дека Советот за заштита на потрошувачите треба да биде квалитетен за да се постигне посакуваната цел, а советникот Зоран Петрушевски обвини за избор по партиски критериум.

- Кога сме кај составот на правните лица водевме сметка да има претставници од различни бранши, а кај физичките лица има претставници од позицијата и од опозицијата што може да се постигне добар баланс. Тука нема потреба од надгласување, повеќе ќе ги користиме нивните стручни и авторитативни капацитети, и нивните совети како претставници на бизнис заедницата и граѓанска заедница, за тоа што е добро и што не е добро, и како треба да се движи работата на органите во локалната самоуправа, - изјави претседателката на Советот, Атина Мургашанска.  

Формирањето на Совет за заштита на потрошувачи е предвиден во програмата на Советот на Општина Куманово, а го налага Законот за локална самоуправа.