Јапонија донирала половина милион евра за проекти во Куманово

Преку програмата за мали грантови, Куманово доби возила за изнесување смет и друга техничка помош за јавните претпријатија, средства за реконструкција на училишта, патишта и 13 милиони денари за регулација на речното корито на Липковка.

„Јапонската програма во Македонија започна во 1996 година и досега Јапонија во Куманово има донирано половина милион евра за 10 локални проекти. Јапонија, исто така, донираше два милиони долари во регионот за време на бегалската криза, вклучувајќи го и транзинтниот центар во Табановце. Последната помош на Куманово беше финасирање на проект на УНДП за превенција од поплави, преку регулација на речното корито на Липковска река“,- изјави амбасадорката на Јапонија во Македонија, Кеико Ханеда, при денешната посета на Куманово.

Со помош од 67.830 евра, реконструирано е основното училиште „Вук Караџиќ“ во Куманово“. На свеченоста по повод завршување на проектот и патронатот на училиштето, присуствуваше и амбасадорката.

„Многу ми е мило што гледам дека училиштето има нов покрив и прозорци, подобрени услови за работа на децата и наставниците. Децата се нашата иднина и затоа образованието е толку важно. Јапонскиот народ е среќен што може да ги посреќи децата во ова училиште“, - рече Ханеда.

Амбасадорката ја посети и Општина Куманово и разговараше со градоначаникот Максим Димитриевски, кој се заблагодари за поддршка и помошта на Куманово и најави продлабочување на соработката со јапонската валада.

„Народот на Јапонија за граѓаните на Куманово преку амбасадата има донирано значителни средства за нашиот град и имплементирано поголем број на проекти. Затоа уште еднаш сакам да се заблагодарам на амбасадорот за денешната посета и да продолжиме во позитивен дух да ги надградуваме нашите односи, се со цел привлекување на странски инвеститори од Јапонија во нашата општина“ - изјави градоначалникот Димитриевски.

Благодарност упатија и вработените и учениците од основното училиште „Вук Караџиќ“, со приредба по повод патронатот на училиштето и релизација на проектот.