„Куманово-паркинг“ ќе потроши 14 милиони денари за осветлување

На денешната 45-та седница на Советот на општина Куманово, дел од советниците реагираа дека во градот има проблеми со уличното осветлување.

Градот ни е неосветлен, централното градско подрачје, за населбите да не збориме. Замената се врши со месеци откако ќе пријават граѓаните - кажа Христина Краиновиќ, советничка од ВМРО-ДПМНЕ.

Директорот на „Куманово-паркинг“, Фадиљ Шабани рече дека се трудат да одговорат на потребите на граѓаните и осветлувањето да биде што подобро.

Во делот на уличното осветлување граѓаните се сведоци дека во последно време, централното градско подрајче, меѓутоа и сите делови надвор од централно градско подрачје односно околина, се осветлени и правиме надчовечки напори тоа да го завршиме успешно - изјави Шабани.

Тој на седницата потенцираше дека имаат потреба од ново пајак возило и планираат истото да го купат во 2016 година за што ќе им треба дозвола од општината. Шабани кажа дека она пајак возило што веќе го користат е произведено во 1986 година, а потребна е и машина за бележење на паркинг простор.

Советниците ги поддржаа програмите на ова претпријатије кои се најдоа на дневен ред на седницата.