Наместо да се украсува градот да се помогне на бездомниците, бара Левица

По информацијата дека Општина Куманово определила 1.722.000 денари за новогодишно украсување на градот, од партијата истакнуваат дека во време на општа бесперспективност и безнадежност, материјална осиромашеност, во време кога воздухот е непрестано загаден, накитениот град нема никого да развесели и усреќи.

„Наместо да глумиме нормалност, треба да почнеме така да се однесуваме, што значи дека треба да дејствуваме соодветно на реалните проблеми и потреби со кои се соочуваме. Затоа ви предлагаме предвидената сума наменета за украсување на градот да ја пренамените за организирање на прифатилиште, во коешто ќе се сместат бездомните граѓани во овие зимски периоди. Изборот е ваш, или ќе подадете рака кон загрозените и беспомошните сограѓани или ќе ги оставите да презимат во запуштените и руинирани хотели на милост и немилост на студот. Со ова не се решаваат сите проблеми, но ова ќе претставува еден гест на човечност, солидарност и социјална одговорност“, - соопштуваат од партијата Левица.