Од затворот К`шање амнестирани 109 затвореници

Од нив 71 ќе бидат ослободени целосно, а на 38 лица им се намалува казната затвор.

„Од затворот Куманово предлозите за амнестија ги доставивме до сите основни судови во државата од кои доаѓаат пресудите, a тие имаат рок од 5 дена да донесат решение за ослободување.  Врз основа на тие решенија ние ќе постапуваме “,- изјави директорот на затворот Марјан Спасовски.

Затворот К`шање има капацитет за 200 осудени лица и 50 за притвор. Условите во овој затвор се најдобри во однос на другите во државата, бидејќи затворот е нов и беше пуштен во употреба пред 5 години.

Амнестијата не се однесува на лицата осудени со правосилна пресуда на казна доживотен затвор, убиство, кривични дела против избори и гласање, против полова слобода и половиот морал, кривични дела против државата, кривични дела против јавниот ред и мир, кривични дела против човечноста и меѓународното право. Амнестијата не се однесува и на лицата кои кривичните дела ги сториле по 20.09.2017.

Се очекува на ниво на државата да бидат ослободени од издржување на казната затвор над 650 лица осудени до 6 месеци, а на 3.000 лица ќе им биде намалена казната за 30 отсто.