Селото Колитско отсечено од светот, децата не одат на училиште

 Жителите се жалат дека службата за зимско одржување и по четири дена отткако падна снегот ни еднаш не поминала со механизација да го исчисти селскиот пат, за да можат децата да одат на училиште а возрасните на работа.

-Селото е целосно блокирано, немаме начин како да излеземе. Се работи за пат долг 4 километри, кој го поврзува селото со регионалниот пат Куманово-Свети Николе. Вчера еден од мештаните се обиде да излезе од селото, но се заглави, па едвај го извлековме со трактори од снегот. Имаме две деца кои од понеделник не посетуваат настава во училиштето во село Орашац, бидејќи нема со што да отидат. Во селото имаме повозрасни и болни луѓе на кои им треба лекарска помош, а не можеме да излеземе од снегот, -изјави Стое Јаневски, претседател на м.з. Колитско.

Тој апелираше до градначалникот Максим Димитриевски и локалната самоуправа да интервенираат кај надлежните служби за да им се очисти патот. Тие еднаш имале средба со градоначалникот за поправка на патот, но и покрај неговите ветувања проблемот се уште не е решен.  

Во селото Колитско живеат 35 жители.