Со пластични столбчиња ќе се огради велосипедската патека на „Октомвриска“

Градоначалникот на Куманово Максим Димитриевски, вели дека интенција на Општината е да ги ослободи сообраќајни површини на булеварите на „Октомвриска револуција“ и „Трета МУБ“, за да се зголеми користењето на велосипедите во градот и да можат граѓаните непречено да се движат по тротоарите.

  - Веќе порачавме проект за булеварот „Октомвриска револуција“, за поставување на пластични столбчиња или т.н. „бампери“, за да можат да се обележат овие сообраќајни површини, а воедно да се спречат несовесните возчи да ги паркираат своите возила на патеките. Проектот е во завршна фаза и се надевам дека до крајот на оваа година ќе успееме да и дадеме нов лик на „Октомвриска револуција“. Потоа ќе пристапиме со таков план и ќе се обидеме „Трета МУБ“ да ја ослободиме за велосипедистите и паралелно ќе воведеме втора зона на паркирање во градот, - изјави Димитриевски.

Тој апелираше до граѓаните да го користат платениот паркинг просторот за своите возилата, наместо непрописно да се паркираат во околните улички и сокаци, поради што се создава хаос во сообраќајот. Затоа од сообраќајната полиција побара несовесните возачи и прекршителите во сообраќајот да ги казни.

Куманово има инфраструктура за 7000 возила, а во градот се возат 27.000 возила.