Ќе се проширува царински терминал Табановце

 Со надградба на граничниот премин Табановце, Република Македонија ќе добие уште еден современ премин, кој со новата инфраструктура ќе даде можности за забрзан и олеснет прекуграничен промет, согласно потребите на бизнис заедницата и на граѓаните. Реализацијата на овој проект истовремено значи и подобрување на условите за попријатен престој на граничниот премин на патниците и подобри услови за работа на царинските службеници.

Проектот за надградба на ГП Табановце е финансиран од програмата ИПА и национално кофинансирање. За реализација на проектот предвидени се средства во износ над 1,8 милион евра.

Заради непречено одвивање на работите, како и избегнување на подолги задржувања за влез и за излез од државата, на патниот граничен премин Табановце во наредниот период ќе се одвиваат градежни активности за проширување на постојниот царински терминал, изградба на други објекти и дополнителни сообраќајни ленти за движење на товарниот сообраќај. За оваа цел со посебна сообраќајна сигнализација ќе биде воспоставен времен сообраќаен режим.