Честитка од ВМРО-ДПМНЕ за 11 Октомври

Славејќи го јубилејниот почеток на Народното востание, граѓаните на Куманово не си спомнуваат единствено за истрелот на првата пушка како најчеста историографска одредница на градот и кумановското граѓанство, туку, уште повеќе, за плодоносниот придонес на кумановците во втемелувањето на македонската државност преку Народноослободителната војна.

Пред 75 години кумановки и кумановци немаа дилема дали слободата и мирот на трудољубивото население можеа да се гарантираат со ветувања и акти на новата окупаторска управа или слободата и мирот се заслужуваат со лична и колективна саможртва!

Историјата несомнено утврди дека младата кумановска интелигенција целосно ги разбираше предизвиците на новото време и затоа храбро се одлучи, рамо до рамо со останатите македонски сонародници, во герилска борба да се спротивстави на ветениот - праведен, а во суштина - поробувачки поредок.

Водени од историски, блиското, илинденско искуство и комитската револуционерна традиција и одзивајќи се на одекот од Карпошовото востание, кумановските партизани ја заслужија привилегијата, како нови карпошовци, преку вториот Илинден - АСНОМ, да се запишат во темелите на современата македонска република.

Непокорот и истрајноста се испишан крвав завет на кумановските карпошовци како единствена вистина за црвено Куманово и како најдобро оружје против премрежијата и на нашата и на идните генерации!

За многу години нека е празникот и за вечен спомен на карпошовците!- стои во честитката од ВМРО-ДПМНЕ Куманово.