Градот првоборец го прослави 11 Октомври на Спомен костурницата

Свежо цвеќе на споменикот положија државни и општински делегации, а за значењето на празникот зборуваше градоначалникот Зоран Дамјановски, кој повика на пожртвуваност и достоинство на младите во справување со современите предизвици во државата.

 „Од нашите нови, млади, образовани и современи генерации историјата не бара поднесување на човечки животи за доброто на народот, туку бара пожртвуваност, патриотизам и достоинство во решавањето на современите предизвици, кои се на патот на демократијата, правното општество и економската перспектива на Република Македонија. Држава на рамноправни, правдољубиви и слободни граѓани, а заради побрзо интегрирање со развиениот демократски свет во Европа. Нашата денешна заложба е да се зачува плодот на борбата започната во октомври 1941 година. Куманово секогаш во историјата знаеше да го покаже своето човечко лице, во војната и мирот. Од тие причини обврска на секоја генерација и на нашата на помладите генерации да им ги оставиме нашите колективни историски паметења во аманет, за да и тие на идните наши генерации од нашиот град и нашата држава да го одбележуваат истото,, - рече во своето обраќање Дамјновски.

Куманово, како град првоборец за време на Втората светска војна даде 800 борци, а 8 се прогласени за народни херои. Еден од преживеаните борци е Љубомир Спасовски (96) од Куманово. Тој се сеќава дека кумановци масовно заминувале во партизани.

„Јас заминав на 24 години, бев оженет и дома оставив жена и две деца. Бев во минерскиот батаљон и вршевме диверзантски дејствија на германската војска по сите козјачки села. Во партизанските одреди се вклучуваа деца од 17-18 години, некои беа мали и ги враќаа, - вели дедо Љубомир.

Народното востание во кумановско започнало пред 75 години со излегување на двата партизански одреда Козјачкиот и Карадачкиот од месноста Менкова колиба и Студена вода, кои се судриле со бугарскиот окупатор. Брзо биле разбиени од посилната и вооружена војска, но тоа не ги поколебало кумановските борци подобро да се организираат и да ја продолжат својата борба до целосно ослободување од окупаторот.