Колегите и роднините се простија од Павлевски

На комеморацијата со едноминутно молчење му оддадоа почит, а за неговиот лик и дело говореа колегите од Центарот за култура и од театар Куманово. Пред присутните беше прочитана неговата биографија, по што во име на вработените од “Трајко Прокопиев“ се обрати Сузана Трајковска, која кажа дека загубиле директор и пријател.

Веста која ја слушнавме не сакавме да ја земеме како вистина. До последен час од твојот живот беше со музиката. Музиката беше твојот живот. Твојот ведар лик, твојата мила душа, смислата за хумор те правеа голема личност. Беше прв меѓу еднаквите, многу скромна личност. Ти не беше директор кој наредува, ти беше наш организатор, работевме како тим - изјави Трајковска.

Актерот Горан Илиќ рече дека Павлевски прерано замина и изрази сочувство до најблиските.

Се надевам дека и таму во вечноста ќе останеш доследен на своите принципи. Нека ти е вечна слава - кажа Илиќ.

На комеморацијата почит му изразија  и актерите од албанската драма. Беа прочитани телеграми со сочувство од македонските театри и театарот од Силистра, Бугарија. Погребот е во 15 часот на Градските гробишта.