Композиција на џез музичарот Гордан Спасовски на репертоарот на Балканскиот младински џез оркестар

29.04.2021 - 12:33

Дело на младиот македонски композитор Гордан Спасовски од Крива Паланка е меѓу десетте композиции на репертоарот на Балканскиот младински џез оркестар, чија премиера е вечерва, со почеток во 20 часот, во Културно-информативниот центар „Будо Томовиќ“ во Подгорица.

Композиција на џез музичарот Гордан Спасовски на репертоарот на Балканскиот младински џез оркестар

Делото е насловено „Virgo Diamond“, а покрај Спасовски, на листата на композитори чие дело » 5 Charpters & an Epilogue“ исто така ќе биде изведено е и џез музичарот Владимир Ботев од Македонија.

„Среќен сум што Балканскиот младински оркестар ќе ја свири мојата композиција. Овој оркестар го гледам како начин за создавање и зајакнување на музичките врски во регионот и на Балканот“, вели Спасовски, кој иако млад зад себе има богата и успешка кариера и е афирмиран џез музичар во земјава и во странство.

Балкански младински џез оркестар го организира Организацијата за промоција на џез музика и култура „ Jazz Art“ од Подгорица, во партнерство со Музичката академија „Гоце Делчев“ од Штип и Факултетот за музичка уметност од Белград.

Проектот е поддржан од Фондот Западен Балкан, а во него учествуваат 21 музичар и 10 композитори, кои ќе бидат дел од Оркестарот и неговиот репертоар, а како диригенти и експерти се појавуваат Антонио Китановски и Владимир Николов.

„Овој проект е изложба на вистинската културна соработка и резултатот е заеднички, мултикултурен и прекуграничен младински џез оркестар. Балканскиот младински џез оркестар е светилник на промените и помага при приближување на младите музичари и композитори на Блаканот“, велат организаторите.

Гордан Спасовски е пијанист од помладата генерација на македонски џез музичари, кој дипломира на Универзитетот за музика и сценски уметности во Грац, Австрија, како најдобар студент на генерацијата. Зад себе има бројни настапи на европските џез-фестивали и соработки со значајни имиња на џез сцената.

(Ж.Ц.)


2008 - 2021 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk