Кумановската болница доби донација од 100.000 евра од Австриската амбасада

Донацијата вклучува хидраулични болнички кревети и друга опрема наменета за подобрување на условите за лекување и нега на пациентите.

Директорот на болницата, Сашо Стошевски, истакна дека донацијата не претставува само материјална помош, туку и пример како соработката меѓу централната и локалната власт, поддржана од невладини здруженија и амбасади, може да придонесе за унапредување на здравствената заштита на граѓаните на Куманово и на целиот Североисточен Регион.

„Оваа донација ќе обезбеди подобра нега и грижа за пациентите, но ќе ги подобри и условите за работа на медицинскиот персонал. Со неа ќе ја обновиме болничката опрема, особено креветите на интерното одделение, хирургија и неврологија, каде што има најголема потреба, а потоа и на другите одделенија. Чекор по чекор градиме поквалитетно здравство и подобри услови за пациентите“, изјави Стошевски.

Претседателката на здружението „Витези Темплари“, Гордана Зечевиќ, информираше дека донацијата опфаќа 40 хидраулични кревети со душеци, наткасни и 19 греалки, со цел подобрување на условите во болницата.

„Ова е дел од донацијата, а напролет се очекува уште една голема донација. Вредноста на донацијата е во задоволството на пациентите“, изјави Зечевиќ од „Витези Темплари Македонија“.

Австрискиот амбасадор Мартин Палмер истакна дека донацијата е продолжение на успешната соработка меѓу двете земји, особено со Куманово. Тој потсети дека градот претходно добил донација од австриската покраина Тирол во противпожарни возила, како и обука за пожарникарите.

Градоначалникот Максим Димитриевски им се заблагодари на иницијаторите од здружението „Витези Темплари“, на австриските граѓани кои го финансирале проектот, како и на сите здруженија и компании што помогнале донацијата.

Во првиот дел на донацијата, минатиот месец, беа донесени 16 болнички кревети.  Донацијата се реaлизираше во соработка со кумановското здружение на граѓани ДРОМ.