Лујза Винтон прогласена за почесен граѓанин на Куманово

Мнозинството советници се изјаснија позитивно за предлогот на градоначалникот на Куманово, Зоран Дамјановски кој објасни дека Винтон придонела за градот на 9 и 10 мај кога имаше вооружени дејствија во градот и се заложила за проблемот со бегалската криза во земјава.

Во неколку наврати имавме прилика да ја видиме во нашиот град, кога ни беше најпотребна помош почнувајќи од 9 и 10 мај. Го стави на располагање својот кредибилитет, за рехабилитација на населението и помош за граѓаните преку поддршка на проекти - кажа Снежана Захариева, советник и претседател на комисијата за одбележување на празници и манифестации и доделување на награди и признанија.

Советниците од Коалицијата За подобра Македонија негодуваа и рекоа дека Винтон не е позната за пошироката јавност и граѓаните.

Според мене треба да се исполнат повеќе услови и да се препознатливи за населението во Куманово. Ако излеземе и направиме анкета со граѓаните, 10 отсто нема да знаат која е. Јас барем не знам ниту еден проект, треба да се наведе - изјави Драган Петковски, советник од ВМРО-ДПМНЕ.

Претседателот на Советот, Максим Димитриевски го пофали ангажманот на Винтон и потсети дека во 2003 година американскиот дипломат Лоренс Батлер е прогласен за почесен граѓанин на Куманово.