Отишла првпат на базен и се удавила

 Несреќата се случила околу 15.30 часот, кога девојчето со уште две другарки заминало да се капе во базенот. Откако влегле во просторијата скокнала во базенот и почнала да се дави. Присутните деца успејале да ја извадат и да ја изнесат надвор, по што и укажале прва помош. Веднаш повикале Итна помош, но лекарите само констатирале дека починала. Тие го пријавиле случајот во полиција.

Во домот на семејството Џафери шок и неверување од она што се случило. Роднини и соседи собрани пред куќата чекаа да го донесат телото од обукција. Кажуваат дека девојчето било трето од четирите деца во семејството и вчера за првпат отишло да се капе во бањата.

Сабајле беше дома и го метеше дворот. Правевме муабет. Беше многу мирно и вредно девојче, не одеше на училиште, но помагаше дома. Сите комшиски деца одат на тој базен, па отиде и таа, мерак и беше. И се случи несреќа. Попладне дојде полицијата и ни кажа дека се удавила, - раскажува стрината на Ванеса, Игбала. 

Увид на местото на настанот извршиле јавен обвинител и екипа на СВР Куманово.

 Со Кумановска бања до пред 10 години стопанисуваше АД „Бисерка“, а по нејзино затворање, базенот и целиот имот остана незаштитен.

Во 2012 година, кумановска фирма доби концесија за експлоатација на минералната вода, а од пред неколку дена и дозвола за реновирање на објектот каде што се наоѓа базенот со минералана вода. Денеска работници го чистеа и изнесуваа ѓубрето што со години се собирало во објектот.