Над 10 кумановци годишно заболуваат од хепатит

 Најголем дел од нив се од кумановските села со заразна жолтица од типот А.

„Жолтицата од тип А лесно се регистрира и лесно се дијагностицира во Македонија, но Б и Ц ги откриваме веќе во хроничната фаза кога поминуваат и кога сосема случајно се откриваат. Значи пациентот доаѓа на лекар за едно а се открива друго“, -изјави д-р Розалинда Исјановска, претсавник на невладината организација „Хепта“ на денешната трибина по повод Светскиот ден за борба против хепатитис, во Црвен крст Куманово.

Двата типа на вирусот Б и Ц го оштетуваат црниот дроб што доведува до појава на цироза и до хепатоцелуларен карцином и карцином на црниот дроб, а единствена терапија за цирозата и за карциномот е трансплантација на црниот дроб. Од 2004 година во Македонија задолжителна е вакцинацијата за жолтица Б за сите новороденчиња, која се пренесува преку сите секрети на човековото  тело, а вирусот Ц исклучиво преку крвта.

За да се спречи појавата на заразната жолтица треба да се одржува лична хигиена, да има хигиенски исправна вода за пиење и правилно одлагање на отпадните материи.